Om een of ander rede het die indoenas by Krieket Suid-Afrika (KSA) dit goedgedink om Mark Boucher, Jacques Rudolph en Ashwell Prince vir ’n verdere 12 maande te kontrakteer.

Prince is laas jaar ná die reeks teen Sri Lanka uit die Proteas se toetsspan gedrop omdat hy nie perform het nie en ook omdat hy te stadig is.

Hy is ook nie in die toergroep ingesluit om in die huidige reeks teen Nieu-Seeland te jol nie. Waarom dié 34-jarige speler se kontrak dus hernieu is, is ’n kopkrapper.

In sy laaste drie games in die Supersport-reeks vir die Warriors, het hy tellings van 60, 18, 16, 10, 84 en 26 gescore.

Dit is ’n gemiddeld van net meer as 35 lopies per beurt en nie goed genoeg vir ’n kolwer in die toporde nie. Prince het in Maart 2009 laas meer as 100 lopies vir die Proteas in ’n toets gewiks en het van toe af meer nulletjies agter sy naam as ’n tolvrynommer.