Daar is verlede week weer aantygings gemaak en sterk bewyse ingedien dat die Goue Leeus-Rugbyunie (GLRU) bankrot is.

Die eerste keer in ’n lang tyd het die GLRU-president, Kevin de Klerk, nie met ’n amptelike mediaverklaring gereageer nie.

In die verlede het De Klerk dadelik in ’n mediaverklaring kommentaar gelewer en almal verseker dat dié unie nie geldelike probleme het nie.

Dit het alles begin toe die unie se belegger van ’n multimiljoen rand en mede-eienaar, Guma Tac, verlede jaar in die helfte van die seisoen kop uitgetrek het en nou allerlei beskuldigings links en regs slinger.

De Klerk het egter verlede week benadruk dat die unie nie in ’n geldelike penarie sit nie deur bekend te maak dat die eiendomsgroep Redefine Properties voort­aan sy nuwe sponsor van ’n multimiljoen rand gaan wees.