Die hele wêreld rave oor Die Antwoord, maar eintlik is hulle besig om almal vir ’n heavy gat te vat.

En ek is nie eers bereid om vir enigiemand sorrie te sê oor dié stelling nie. Hulle basse!

Die Antwoord was onlangs op die David Letterman Show in Amerika (nie enige aap kom dáárop nie) en die plaaslike Rolling Stone-tydskrif het waarskynlik die grootste artikel wat nóg oor ’n plaaslike band geplaas is, oor hulle geskryf.

Maar vroeër die week toe ek Die Antwoord se nuwe CD, Ten$ion, in die hande kry, toe onthou ek ’n óú sprokie wat my ma nog vir my vertel het.

Dit was van ’n keiser wat nuwe klere (of bling) wou hê. Twee skelms het gemaak of hulle vir hom ’n fancy jas aanmekaar naai, maar daar was niks. Almal het ge-oe en ge-aa toe die keiser by die straat afstap, maar eintlik was hy heeltemal kaalgat.