PASELLA-AANBIEDER Paul Rothman en sy vrou Monique, wat ou hoërskoolliefdes was, se huweliksbootjie is op die rotse, MAAR HULLE WAS NOOIT EERS WETTIG GETROUD IN SUID-AFRIKA NIE.

Sondag het in September onthul Paul en sy mede-aanbieder op die leefstylprogram Pasella, Vicky Davis, het ’n vuurwarm buite-egtelike verhouding aangeknoop. 

Na die onthulling het hulle blitsig die verhouding stopgesit en Paul het stert tussen die bene huis toe gehol om te red wat daar te redde was. 

Hoewel Paul en Vicky die verhouding hewig ontken het, het Monique aan Sondag erken dat daar ’n verhouding tussen haar man en Vicky was, maar dat die twee dit intussen verbreek het.

“Dit was lelik, maar dis verby. Ons probeer nou weer om bymekaar uit te kom,” het Monique destyds aan Sondag gesê.

Die verhouding het aan die lig gekom na sy blykbaar teenoor ’n kollega gebieg het dat haar man en Vicky ’n stomende verhouding aangeknoop het. 

Toe die storie uitkom, het Paul blykbaar vir Vicky soos ’n warm patat gelos en gehol om sy huwelik te red. Hy en Monique het toe die voorval teenoor ’n tydskrif erken en gesê hulle gaan probeer om hul huwelik te red deur hard aan die verhouding te werk. 

Die voormalige paartjie ken mekaar langer as 20 jaar en was vir 11 jaar daarvan aan mekaar verbind. 

Tydens ’n onderhoud met ’n koerant het Paul gesê hy het Monique om verskoning gevra vir sy “swak keuses” en hulle sou regtig probeer om hul huwelik te red. 

Lyk toe nou nie of dit gewerk het nie. 

Hulle is so stil-stil aan die einde van verlede jaar uitmekaar. 

Amor Engelbrecht, ’n grootkop by Pasella, het bevestig die huweliksbootjie, wat moontlik gekaap is, het gesink.