’N JOHANNESBURGSE vrou (38) se lewe het oornag in ’n nagmerrie ontaard toe sy die uitslag van haar HIV-toets ontvang het - en dis verkeerd! En nou probeer Lancet-laboratoriums die skuld op die dokter pak vir die fout.

Die vrou, wat haar regte naam weerhou uit vrees vir die stigmas rondom HIV, vertel van die HEL waardeur sy die afgelope Desember-vakansie is. 

“Vroeg in Desember is ek na my plaaslike algemene praktisyn omdat ek vreeslik afgemat, oormoeg, oorwerk en gespanne gevoel het. Ek het nie geweet wat fout is nie en het so uitgesien na ’n rustige vakansie. Ek het besluit om sommer ’n reeks toetse te laat doen om uit te vind wat fout is,” vertel sy.

“Toets sommer vir alles, het ek vir die dokter gesê.” 

Die dokter het drie buisies bloed getrek en ook ’n HIV-toets gedoen. 

Op 5 Desember het hy haar gebel en gevra dat sy dadelik na sy praktyk toe moet kom. 

“Toe ek daar kom, was die dokter duidelik baie ontstig. Ek het geskrik. Ek kon sien iets ontstel hom en het gevra dat hy asseblief vir my moet sê wat fout is.”

Die toets-uitslae het teruggekom van Lancet-laboratoriums af en die dokter het haar meegedeel dat sy HIV-positief getoets is.

Dit het haar natuurlik met afgryse, ongeloof en wanhoop gevul. 

“Ek het myself yskoud geskrik, êrens in my agterkop het ek probeer uitmaak hoe dit moontlik kon wees. Het ek in ’n stuk glas getrap, het iemand my met ’n naald gesteek? Het ek êrens met bloed in aanraking gekom? Die vrae het die heeltyd deur my kop gemaal. Ek is al baie lank in ’n vaste verhouding en is ook nie in ’n beroep wat my blootstelling aan die virus kon gee nie,” sê sy.