Bollywood-ster wannabee! 

Soos die veroordeelde moordenaar Donovan Moodley dié week in die hof rondgestap het, sou mens sweer hy gaan ’n sing-en-dans-nommertjie doen in egte Bollywood-styl – as dit net nie vir daai simpel boeie was nie.

Moodley, wat die student Leigh Matthews in 2004 vermoor het, hou sy lyf behoorlik akteur en celebrity. Hy is so uitgehonger vir publisiteit dat hy homself elke dan en wan in die media-kollig plaas. Dié keer doen hy aansoek om ’n herverhoor.

Mal Moodley het klaar begin werk aan sy look: Hy mik duidelik om John Abraham as Bollywood-ster te onttroon!

Dalk nog in die Bollywood-weergawe van Jailhouse Rock. 

Moodley se storie oor die Leigh-moord het dié week, nes sy haarstyl, verander.

Die moordenaar wat in 2005 skuldig bevind en lewenslank gevonnis is, sing nou ’n nuwe deuntjie.

Hy beweer die bewyse teen hom is gemanipuleer. 

Moodley het dié week in die hof getuig hy het “uitgefreak” toe hy die mediadekking oor Leigh se dood gesien het.

Natuurlik sou jy uitgefreak het! Die selfbehepte ou het regter Joop Labuschagne gevra om Oprah te kyk.

“Oprah het eendag ’n program uitgesaai oor hoe baie ‘onskuldige’ mense uit vrees skuldig pleit.” 

“U moet asseblief na die program gaan kyk om my saak beter te verstaan”.