Die akteur Gavin van den Berg het homself ’n maand lank oor ’n mik in ’n rehabilitasiesentrum uit die HEL gewerk om van sy NARE SUIPGEWOONTES ontslae te raak. 

Die eens aantreklike Ballade vir ’n enkeling-held het dié week gebieg: “Ek het myself by die Enoch’s Walk Bible Centre ingeskryf. Ek wou met die “program” begin en het myself kaduks gewerk om van die monsters binne my ontslae te raak. Ek het die aaklige “tronk” met my eie hande skoongeskrop. Dit was walglik.” 

Gavin is gerehabiliteer, want hy wou nie meer sy lewe wegsuip nie, sê hy.

Nou wil hy teruggaan na die sentrum toe “om die mense daar te help. Ek weet party van hulle het potensiaal”. 

Hy’t dalk net effe te laat tot drankbekering gekom, want op 55 lyk hy soos ’n stokou geraamte en sy wange is ingesonke. Sy hande is so geswel soos die olifantman s’n en hy is net ’n skaduwee van die man en akteur wat hy in sy jeug was. 

Gavin sê: “Ek was ’n alkoholis, maar ek is nou 100% skoon en ek drink nie meer nie.”

Hy het te veel gedrink. Dit het niks met die vermaakbedryf te doen nie, maar met jou eie probleme en monsters.” 

Gavin se vriendin het hom laas jaar op 14 Desember by die 45 ha plaas naby die Hennopsrivier afgelaai.

Hy moes R1 500 betaal vir die “behandeling”, wat nege maande lank duur, en moes hande-arbeid doen. 

Hy het in ’n geroeste karavaan gebly en moes ’n longdrop gebruik. 

“Dit was my keuse. Niemand het my gedwing nie. Dit het my geleer van die lewe. Buite is die plek ’n paradys, maar binne...” 

En toe het hy op ’n dag nie meer vir berading opgedaag nie. Hy het van die sentrum af weggeloop.